కాలుని పెండ్లాడె సీత కడు మోదమునన్.

శ్రీ కంది శంకరయ్య గారు "శంకరాభరణం" బ్లాగునందు 27-03-2012 న ఇచ్చిన సమస్యకు నా పూరణ.

సమస్య - కాలుని పెండ్లాడె సీత కడు మోదమునన్.
కందము:
కాలును మోపెను భువిపై
కాలునిగా రాక్షసులను కాటికి బంపన్
కాలుని విలు ద్రుంచిన సమ
కాలుని, పెండ్లాడె సీత కడు మోదమునన్.

కందము:
కాలుని విల్లును ద్రుంచి స
కాలములో రాముడెదుట కనుపించగనే
మేలుగ దలచుచు మనసున
కాలుని, పెండ్లాడె సీత కడు మోదమునన్.
కందము:
మేలాయెను సెల్ ఫోన్ తో
కాలేజీ రోజుల నొక కాల్జేసెను, రాంగ్
కాలే ప్రేమా యెను, 'రాంగ్
కాలుని' పెండ్లాడె సీత కడు మోదమునన్
సమస్య - కాలునిఁ బెండ్లియాడె నఁటఁ గామిని సీత మహోత్సవంబునన్.

ఉత్పలమాల:
కాలుని వేష ధారి మరి కామిని పాత్రను వేయు సీతయే
సోలిరి ప్రేమలోన గన సోయగ మొప్పగ ప్రేక్షకాళియే
పూలను జల్లి సంబరము పొల్పుగ జేసిరి మంటపమ్ములో
కాలునిఁ బెండ్లియాడె నఁటఁ గామిని సీత మహోత్సవంబునన్.